ჩვილების თვალის ჯანმრთელობა

ჩვილს, რომლის თვალებიც გარეგნულად ჯანმრთელად გამოიყურება, პირველი რუტინული ოფთალმოლოგიური გასინჯვა 4–6 კვირის ასაკში უნდა ჩაუტარდეს. დროდადრო შეამოწმეთ თქვენი ჩვილის მხედველობა — მონაცვლეობით დაუფარეთ ხოლმე თითო თვალი. თუ მხედველობის პრობლემა ცალ თვალს აქვს, მხედველი თვალის დაფარვისას ბავშვი იტირებს და თქვენი ხელის მოშორებას შეეცდება, მეორე თვალის დაფარვაზე კი არანაირ რეაქციას არ გამოავლენს.

შემდეგ შემთხვევებში კი ჩვილი ოფთალმოლოგთან 1 წლის ასაკის მოლოდინის გარეშე უნდა მიიყვანოთ.

პრობლემა 1. თვალზე ჭუჭყის (გამონადენის) დაგროვება, სიწითლე

შესაძლო დიაგნოზი: ბაქტერიული კონიუნქტივიტი. ეს ჩვილებში ძალიან გავრცელებული პრობლემაა. განსაკუთრებით ხშირად ზედა სასუნთქი გზების ინფექციასთან ერთად გვხვდება. მკურნალობით 1 კვირიდან 10 დღემდე ვადაში გადის.

მკურნალობა: ანტიბიოტიკიანი წვეთები, გელები და მალამოები

პრობლემა 2. თვალის მუდმივი ცრემლდენა

შესაძლო დიაგნოზი: ცრემლსადენი არხის გაუვალობა. ერთ წლამდე ასაკში ხშირად გვხვდება.

მკურნალობა: ცხვირის ძირის მიდამოს მასაჟი. თუ მასაჟის ფონზე პირველი წლის განმავლობაში გაუვალობა თავისით არ მოიხსნა, ანესთეზიის ქვეშ, მეთოდით, რომელსაც „ზონდირება“ ეწოდება, არხის ხვრელს ხსნიან.

პრობლემა 3. თვალის შიგნით ან გარეთ გადახრა

შესაძლო დიაგნოზი: ეს შეიძლება იყოს ნამდვილი გადახრა (სიელმე), მაგრამ შეიძლება ცრუ გადახრაც იყოს. რადგან ჩვილებს ცხვირის ძირი ბრტყელი აქვთ, ქუთუთოების შიდა კუთხეებთან შეიძლება კანის ნაკეცი იყოს; ამ იერსახით შექმნილ თვალის გადახრის შთაბეჭდილებას „ცრუ სიელმე“ (ფსევდოსტრაბიზმი) ეწოდება.

გამოსავალი: სიელმის არსებობისას მას სათვალით და/ან ოპერაციით მკურნალობენ. ცრუ სიელმის იერსახე კი თავისით გაქრება, რადგან ასაკთან ერთად ცხვირის ძირი მაღლდება.

პრობლემა 4. თვალების ქავილი, გამონადენი

შესაძლო დიაგნოზი: ალერგიული კონიუნქტივიტი

გამოსავალი: ანტიალერგიული წვეთები

პრობლემა 5. საგნებს თვალს არ აყოლებს, ნაცნობ სახეებზე რეაქცია არ აქვს

შესაძლო დიაგნოზი: მხედველობის დამაბრკოლებელი თანდაყოლილი კატარაქტა (თვალის ბროლის გამჭვირვალობის დაკარგვა) ან ბადურის (თვალის ნერვული შრის) პრობლემა

გამოსავალი: კატარაქტას ოპერაციით მკურნალობენ. ბადურის პრობლემები ზოგჯერ ქირურგიულ ჩარევას საჭიროებს, სამწუხაროდ, ზოგჯერ კი მათი გადაჭრა შეუძლებელია.

პრობლემა 6. გუგაში თეთრი ფერის ანარეკლი

შესაძლო დიაგნოზი: მხედველობის დამაბრკოლებელი თანდაყოლილი კატარაქტა ან ბადურის პრობლემები

გამოსავალი: კატარაქტის დროს — ოპერაცია, ბადურის პრობლემების დროს — მეთვალყურეობა ან ქირურგიული ჩარევა

პრობლემა 7. ქუთუთოს დაშვება

შესაძლო დიაგნოზი: ქუთუთოს თანდაყოლილი პტოზი (დაშვება)

გამოსავალი: ზედა ქუთუთოს ქირურგიული აწევა

პრობლემა 8. თვალების კანკალისებრი მოძრაობა

შესაძლო დიაგნოზი: თვალების უნებლიე, რიტმული მოძრაობები, რომლებსაც ნისტაგმი ეწოდება. ნისტაგმს სხვადასხვა ტიპი და სხვადასხვა მიზეზი აქვს.

გამოსავალი: ნისტაგმის მკურნალობა მისი ტიპისა და მიზეზის მიხედვით იგეგმება. გამოიყენება სათვალე, პრიზმული სათვალე და ქირურგიული ჩარევა.

პრობლემა 9. ქუთუთოების შეშუპება

შესაძლო დიაგნოზი: დერმოიდული კისტა, ჰემანგიომა და ქუთუთოს სხვა წარმონაქმნები

გამოსავალი: წარმონაქმნის ტიპის მიხედვით — ზოგჯერ მხოლოდ მეთვალყურეობა, ზოგჯერ წარმონაქმნში სხვადასხვა ნივთიერების ინექცია, ზოგჯერ კი წარმონაქმნის ქირურგიული მოცილება