ტრიფოკალური („ჭკვიანი“) თვალშიდა ლინზა

ტრიფოკალური („ჭკვიანი“) ლინზის ოპერაციის მიმდინარეობა

• თვალს აყუჩებენ საანესთეზიო წვეთებით.
• ქუთუთოებს ხსნიან „ბლეფაროსტატად“ წოდებული ინსტრუმენტით.
• თვალზე „სლიტ-დანით“ ან ფემტოწამიანი ლაზერით კეთდება 3,2 მმ სიგრძის განაკვეთი.
• ამ განაკვეთის გავლით შედიან თვალში და კატარაქტული ბროლის დამფარავ კაფსულას წრიულად აცლიან.
• კაფსულის შიგნით, კატარაქტული ბროლის გარშემო, სითხე შეჰყავთ.
• ფაკოემულსიფიკაციის აპარატის წვერით ბროლი იშლება და ამოიწოვება.
• ბროლის დარჩენილი კაფსულის შიგნით თავსდება „ჭკვიანი“ ხელოვნური ლინზა.
• თვალზე ხდება ანტიბიოტიკისა და კორტიზონის აპლიკაცია და პაციენტს დამცავ სათვალეს უკეთებენ.

ტრიფოკალური („ჭკვიანი“) ლინზის ოპერაციის შესაძლო გართულებები

• ოპერაციის დროს:
• ბროლის კაფსულის გახევა
• ბროლის ფრაგმენტების ან მთლიანი ბროლის ჩავარდნა თვალის შიდა (უკანა) ნაწილში
• ოპერაციის შემდეგ:
• თვალის მძიმე ინფექცია — „ენდოფთალმიტი“
• რქოვანას შეშუპება (სითხის დაგროვება, გასიება)
• თვალში ჩადგმული ლინზის ადგილიდან გადაადგილება
• თვალის ნერვული შრის (ბადურის) აშრევება
• თვალის ყვითელი ლაქის (მაკულის) შეშუპება

ოპერაციის შემდგომი მოვლა

ოპერაციის შემდეგ საავადმყოფოში დარჩენა საჭირო არ არის. ოპერაციის მეორე დღეს ტარდება თვალის შემოწმება. დანიშნული თვალის წვეთები რეგულარულად უნდა გამოიყენოთ. წვეთები იწვეთება სიფხიზლის საათებში, ქვედა ქუთუთოს ქვემოთ ჩამოწევით.

პირველი 1 კვირა: ნუ დაწვებით ნაოპერაციებ თვალზე. ერიდეთ თვალში წყლისა და საპნის მოხვედრას. თმა დაიბანეთ თავგადაწეულმა, ისე, როგორც პარიკმახერთან. თვალის გარშემო ნუ გამოიყენებთ კრემსა და მაკიაჟს. გარეთ გაიკეთეთ მზის სათვალე ან, თუ გაქვთ, თქვენი დიოპტრიული სათვალე (ნაოპერაციები თვალის მხარეს მინა შეცვალეთ დიოპტრიის გარეშე მინით). სეირნობა შეიძლება. ცურვა, სიმძიმეების აწევა და ლოცვისას მიწამდე დახრა (სეჯდე) არ არის მიზანშეწონილი.

მე-2 კვირიდან: შეგიძლიათ დაუბრუნდეთ ჩვეულ ყოველდღიურ ცხოვრებას. თუმცა თვალების ძლიერად ფშვნეტა არასდროს შეიძლება.

თვალის საკონტროლო ვიზიტები ტრიფოკალური („ჭკვიანი“) ლინზის ჩადგმის შემდეგ

რუტინული საკონტროლო გასინჯვები ტარდება ოპერაციის მეორე დღეს, 1 თვისა და 6 თვის შემდეგ. მეექვსე თვის გასინჯვისას მოწმდება, ხომ არ დაკარგა გამჭვირვალობა კაფსულამ, რომელშიც ხელოვნური ლინზაა მოთავსებული, ანუ ხომ არ განვითარდა „უკანა კაფსულის შემღვრევა“. ეს შემღვრევა შეიძლება განვითარდეს ოპერაციიდან 3 თვიდან 4 წლამდე პერიოდში. უკანა კაფსულის შემღვრევისას YAG-ლაზერით შემღვრეული კაფსულის ცენტრში ხვრელი კეთდება და ცენტრალურ ზონაში ფარდის ეფექტი ქრება.

ადამიანებისთვის, რომლებსაც ტრიფოკალური („ჭკვიანი“) ლინზა აქვთ ჩადგმული, მნიშვნელოვანია, მთელი სიცოცხლის განმავლობაში წელიწადში ერთხელ გაიარონ თვალის გასინჯვა.

ტრიფოკალური („ჭკვიანი“) ლინზის ჩადგმის წარმატების მაჩვენებელი

თუ თვალში ტრიფოკალური (შორს, საშუალო მანძილზე და ახლოს ფოკუსირებული) ხელოვნური ლინზა ჩაიდგმება, ნაოპერაციები პაციენტების 90%-ისთვის შესაძლებელი ხდება როგორც ახლოს, ისე შორს სათვალის გარეშე ხედვა.

თუ ოპერაციიდან 3 თვის შემდეგ დიოპტრია შენარჩუნდა, მის აღმოსაფხვრელად შესაძლებელია დამატებითი ლაზერული მკურნალობის (FemtoLASIK, iLASIK) ჩატარება.